സിഡ്നി: ഓസ്ട്രേലിയയിലെ നിരവധി നഗരങ്ങളില് കുടിയേറ്റക്കാര്ക്കെതിരേ കൂറ്റൻ പ്രക്ഷോഭം അരങ്ങേറി. ‘മാര്ച്ച് ഫോര് ഓസ്ട്രേലിയ’ എന്ന തീവ്രവലതുപക്ഷ സാമൂഹ്യ മാധ്യമ ഗ്രൂപ്പിന്റെ നേതൃത്വത്തിലാണ് പ്രതിഷേധങ്ങള് സംഘടിപ്പിക്കപ്പെട്ടത്. ആയിരക്കണക്കിന് പേര് ഈ പ്രതിഷേധങ്ങളില് പങ്കെടുത്തതായി റിപ്പോര്ട്ടുകളുണ്ട്.
ബഹുജന കുടിയേറ്റം അവസാനിപ്പിക്കണമെന്ന് ആവശ്യപ്പെട്ടാണ് പ്രകടനങ്ങള്. നിലവിലെ കുടിയേറ്റ നയങ്ങള് രാജ്യത്തിന്റെ ഐക്യത്തെയും സാംസ്കാരിക ഐശ്വര്യത്തെയും ബാധിക്കുന്നുവെന്നാണു പ്രതിഷേധക്കാര് ഉന്നയിച്ച പ്രധാനമായ ആക്ഷേപം.
കുടിയേറ്റക്കാരെ ലക്ഷ്യമാക്കി വിദ്വേഷപരമായ ലഘുലേഖകളും നോട്ടീസുകളും പ്രക്ഷോഭത്തില് പങ്കെടുത്തവര് വിതരണം ചെയ്തു. “പൊതുസമൂഹത്തിന്റെ ഘടനയെ മാറ്റിയിരിക്കുകയാണ് കുടിയേറ്റം” എന്നടക്കമുള്ള വാക്യങ്ങള് ഇതിലുണ്ടായിരുന്നു. ഇന്ത്യക്കാര് ഓസ്ട്രേലിയയിലെ മൊത്തം ജനസംഖ്യയുടെ 3% വരെ ആയി വളർന്നുവെന്നും 2013 മുതല് 2023 വരെയുള്ള ദശകത്തില് അവരുടെ എണ്ണം രണ്ടിരട്ടിയായെന്നുമാണ് ഇവര് ഉദ്ധരിച്ച കണക്കുകള്.
“നമ്മുടെ രാജ്യം തിരികെ നേടുക”, “നമ്മുടെ സംസ്കാരം സംരക്ഷിക്കുക” തുടങ്ങിയ വാചകങ്ങളോടൊപ്പം നാഷണലിസ്റ്റ് സ്വഭാവമുള്ള സന്ദേശങ്ങളാണ് പ്രക്ഷോഭത്തില് പ്രചരിച്ചത്. ഭൂരിപക്ഷ ഓസ്ട്രേലിയന് പൗരന്മാരും ഈ ആവശ്യങ്ങളോട് ഐക്യപ്പെടുന്നതായും സംഘാടകര് അവകാശപ്പെട്ടു.
അതേസമയം, ഇവര് നടത്തിയ പ്രതിഷേധം വംശീയതയും വിദ്വേഷവും പ്രചരിപ്പിക്കുന്നതാണെന്ന് ഓസ്ട്രേലിയന് സര്ക്കാര് വൃത്തങ്ങള് ആരോപിച്ചു. പ്രതിഷേധത്തിനൊപ്പം ചേര്ന്നിരുന്നവരില് ചിലര്ക്ക് നിയോ-നാസി ബന്ധങ്ങളുണ്ടെന്നും ആഭ്യന്തര സുരക്ഷാ വകുപ്പ് ആരോപിച്ചു. ഇത്തരം പ്രക്ഷോഭങ്ങള്ക്ക് പിന്തുണ നല്കുന്നതല്ലെന്നും, സമൂഹത്തെ വിഭജിക്കുന്ന ഏതെങ്കിലും നീക്കങ്ങള് ന്യായീകരിക്കാനാവില്ലെന്നും ഫെഡറല് മന്ത്രി പ്രതികരിച്ചു.
നിയോ-നാസി ബന്ധമുള്ളതെന്ന ആരോപണം സംഘടന ശക്തമായി നിഷേധിച്ചെങ്കിലും, പ്രതിഷേധത്തിന്റെ തീവ്രതയും ആശയവിനിമയത്തിന്റെ സ്വഭാവവും ഓസ്ട്രേലിയന് സമൂഹത്തില് ചർച്ചയ്ക്ക് ഇടയാക്കിയിരിക്കുകയാണ്.