പാരിസ്: ഫ്രാൻസിലെ ന്യൂനപക്ഷ സർക്കാരിന്റെ നേതൃത്വത്തിൽ പ്രവർത്തിച്ചിരുന്ന പ്രധാനമന്ത്രി ഫ്രാൻസ്വാ ബെയ്റു നിയമസഭയിൽ നടത്തിയ വിശ്വാസവോട്ടെടുപ്പിൽ പരാജയപ്പെട്ടതോടെ അദ്ദേഹത്തിന്റെ ഒമ്പത് മാസത്തെ അധികാരകാലത്തിന് അവസാനമായി. 364 എംപിമാർ ബെയ്റുവിനെതിരെ വോട്ടുചെയ്തപ്പോൾ 194 പേരാണ് അനുകൂലമായി നിലപാടെടുത്തത്. ഈ തോൽവിയോടെ രാജ്യം വീണ്ടും രാഷ്ട്രീയ അനിശ്ചിതത്വത്തിലേക്ക് തിരിയുകയാണ്.
കടം കുറയ്ക്കുവാനുള്ള പദ്ധതികൾ പരാജയത്തിൽ നിർണായകമായി
€44 ബില്യൺ ചെലവ്കുറക്കൽ ലക്ഷ്യമിട്ട ബഡ്ജറ്റ് പൊതുഅവധി കുറവ്, കടബാധ്യത നിയന്ത്രണം തുടങ്ങിയ കർശന സാമ്പത്തിക നടപടികൾ ജനപ്രതിനിധികളുടെ കടുത്ത എതിർപ്പിന് ഇടയാക്കി. ഈ പദ്ധതികൾ നടപ്പാക്കാൻ സാധിക്കാതിരുന്നത് ബെയ്റുവിന്റെ ഭരണത്തിൻ്റെ തകർച്ചയിലേക്കുള്ള വഴി തുറന്നു.
ചരിത്രത്തിലെ മൂന്നാമത്തെ മന്ത്രിസഭയാണ് തകർന്നു പോയത്.
1958-ൽ സ്ഥാപിതമായ ഫ്രഞ്ച് ഫിഫ്ത് റിപ്പബ്ലിക്കിന്റെ ചരിത്രത്തിൽ, നിയമസഭയിൽ വിശ്വാസം നഷ്ടപ്പെട്ട് പ്രധാനമന്ത്രി രാജിയ്ക്കേണ്ടിവരുന്നത് വെറും മൂന്നാമത്തെ സന്ദർഭമാണ്. ഫലത്തിൽ ഈ രാഷ്ട്രീയ സ്ഥിതിഗതികൾ ഫ്രാൻസിന്റെ ചരിത്രത്തിലൊരു അപൂർവ സംഭവമായി രേഖപ്പെടുത്തും.
പുതിയ പ്രധാനമന്ത്രിക്കായി ശ്രമം തുടരുന്നു.
പ്രസിഡന്റ് എമ്മാനുവൽ മാക്രോണിന് ഉടൻ പുതിയ പ്രധാനമന്ത്രിയെ നാമനിർദ്ദേശം ചെയ്യേണ്ടി വരും. ഭൂരിപക്ഷ പിന്തുണയുള്ള സർക്കാരാണ് അടുത്ത ബജറ്റ് അവതരിപ്പിക്കുകയും സാമ്പത്തിക സ്ഥിരത ഉറപ്പാക്കുകയും ചെയ്യേണ്ടത്.
കടം ഉയരുന്നു; സാമ്പത്തിക പ്രതിസന്ധി രൂക്ഷം
ഏപ്രിൽ 2025 വരെ ലഭ്യമായ ഔദ്യോഗിക കണക്കുകൾ പ്രകാരം, ഫ്രാൻസിന്റെ പൊതു കടം ദേശത്തിന്റെ GDPയുടെ 114 ശതമാനമായി ഉയർന്നു. രാജ്യാന്തര വിപണിയിൽ നിന്നുള്ള ധനസമാഹരണ ശ്രമങ്ങളും വലിയ ഫലമുണ്ടാക്കിയിട്ടില്ല.
പ്രതിഷേധങ്ങൾ ശക്തമാകാൻ സാധ്യത
ഭരണപരാജയം ആഴത്തിൽ ബാധിച്ച സാഹചര്യത്തിൽ, തൊഴിലാളി യൂണിയനുകളും പൊതുജന സംഘടനകളും സമരം, ഹർത്താൽ, പുനഃതിരഞ്ഞെടുപ്പ് എന്നീ ആവശ്യങ്ങളുമായി രംഗത്തെത്താൻ സാധ്യതയുണ്ട്. മറൈൻ ലെ പെൻ നയിക്കുന്ന ഫാർ റൈറ്റ് പാർട്ടിയടക്കം, വിവിധ രാഷ്ട്രീയ ശക്തികൾ ഈ അവസരം രാഷ്ട്രീയ നേട്ടത്തിനായി ഉപയോഗിക്കാനുള്ള നീക്കങ്ങളിലാണ്.