ഫെബ്രുവരിയിൽ നിന്ന് അഭയാർഥികളുടെ ചികിത്സാ യാത്രകളിൽ ടാക്സിക്ക് കർശന നിയന്ത്രണം; സർക്കാരിന്റെ പുതിയ മാർഗ്ഗരേഖ
അഭയാർഥികളുടെ ആശുപത്രി–ചികിത്സാ ആവശ്യങ്ങൾക്കായി ദൂരം കൂടിയ ടാക്സി യാത്രകൾ പതിവായതിനെ തുടർന്ന്, ഫെബ്രുവരി മുതൽ ഇത്തരത്തിലുള്ള യാത്രകൾക്ക് നിയന്ത്രണം കൊണ്ടുവരാൻ ബ്രിട്ടീഷ് സർക്കാർ ഒരുങ്ങുന്നു. ചെലവ് അമിതമായി വർധിച്ചെന്ന ആരോപണങ്ങളും അന്വേഷണങ്ങളും പിന്നാലെയാണ് അടിയന്തര ഇടപെടൽ.
അന്വേഷണത്തിൽ 250 മൈൽ ദൂരത്തിലേക്കുള്ള ഒരു രോഗിയെ ടാക്സിയിൽ കൊണ്ടുപോയതും അതിന് സർക്കാർ 600 പൗണ്ട് ചിലവഴിച്ചതും പുറത്തുവന്നിരുന്നു. വർഷംതോറും അഭയാർഥികളുടെ യാത്രയ്ക്ക് 15.8 മില്യൺ പൗണ്ട് സർക്കാരിന് ചെലവാകുന്നുവെന്ന കണക്ക് പുറത്തുവന്നതോടെ സംഭവം കൂടുതൽ വിവാദമായി.
അതേസമയം, ആഴ്ചയിൽ ഒരു റിട്ടേൺ ബസ് പാസ് മാത്രമാണ് അഭയാർഥികൾക്ക് ലഭ്യമാക്കിയിരുന്നത്. മറ്റു യാത്രകൾ—ഡോക്ടർ സന്ദർശനം പോലും—ടാക്സികളിൽ ആയിരുന്നു. ലണ്ടനിലെ ഒരു ഹോട്ടലിന് സമീപം ദിവസേന 15 യാത്രകൾ നടത്തുന്നുവെന്ന ഡ്രൈവർമാരുടെ വെളിപ്പെടുത്തലുകൾ ആഭ്യന്തരകാര്യ വകുപ്പിന് ദിനംപ്രതി ആയിരം പൗണ്ടിനടുത്ത് അധികഭാരമായതായി റിപ്പോർട്ടുകൾ പറയുന്നു.
ചില ഡ്രൈവർമാർ ഉദ്ദേശപൂർവ്വം ദൂരം കൂട്ടി നിരക്കുയർത്തുന്നുവെന്ന ആരോപണവും ഉയർന്നു. ഗാറ്റ്വിക്കിൽ നിന്ന് 110 മൈൽ അകലെയുള്ള റീഡിംഗിലേക്ക് കൊണ്ടുപോയ ഒരു അഭയാർഥിയെ പിന്നീട് വെറും 1.5 മൈൽ മാത്രം അകലെയുള്ള ഡെന്റിസ്റ്റ് ക്ലിനിക്കിലേക്കാണ് യാത്രയാക്കിയതെന്ന കഥയും ഇൻവെസ്റ്റിഗേഷനിൽ പുറത്ത് വന്നു. ദിവസേന 275 മൈൽ വരെ ഇത്തരത്തിലുള്ള യാത്രകൾ നടത്തിയിട്ടുണ്ടെന്നും, അതിലെ പകുതി വരവും വെറുതെയായിരുന്നുവെന്നും ഡ്രൈവർമാർ സമ്മതിച്ചു.
“പാഴ്ചെലവിന് വഴിയൊരുക്കുന്ന, ആസൂത്രണമില്ലാത്ത പഴയ തീരുമാനങ്ങളാണ് ഇതിന് പിന്നിൽ,” എന്നാണ് ആഭ്യന്തരകാര്യ മന്ത്രി ശബാന മഹ്മൂദ് പ്രതികരിച്ചത്. ഫെബ്രുവരി മുതൽ ചികിത്സാ ആവശ്യങ്ങൾക്ക് ടാക്സി ഉപയോഗം ‘അത്യാവശ്യമായ പ്രത്യേക സാഹചര്യങ്ങൾ’ ഒഴികെ അനുവദിക്കില്ലെന്നും അവര് വ്യക്തമാക്കി.
മുൻ ഭരണകൂടം ഒപ്പുവെച്ച അമിതചെലവുള്ള കരാറുകളാണ് സിസ്റ്റത്തെ തളർത്തിയതെന്നും, അഭയാർഥി ഹോട്ടലുകൾ അടച്ച് പാഴ്ചെലവ് കുറയ്ക്കുമെന്നും മന്ത്രി പറഞ്ഞു. ഇനി പൊതു ഗതാഗതമാണ് പ്രധാന മാർഗം. എന്നാൽ ശാരീരിക വൈകല്യം, ദീർഘകാല അസുഖങ്ങൾ, ഗർഭാവസ്ഥയുമായി ബന്ധപ്പെട്ട അടിയന്തര ആവശ്യങ്ങൾ എന്നിവയുള്ളവർക്ക് പ്രത്യേക അനുമതി നൽകും.
ചെലവുചുരുക്കാനും സംവിധാനത്തെ ക്രമപ്പെടുത്താനും ലക്ഷ്യമിട്ട സർക്കാരിന്റെ ഈ പുതിയ മാർഗ്ഗരേഖ ഫെബ്രുവരിയിൽ പ്രാബല്യത്തിൽ വരും.